जनकपुर बोल्ट्सका स्पिनर ललितनारायण राजवंशीले नेपाल प्रिमियर लिग (एनपिएल)मा बाइक पाएका छन् ।

प्रतियोगिताको उत्कृष्ट बलर हुदै ललितले बाइक पाएका हुन् । शनिवार सम्पन्न लिगमा ललित आबद्ध जनकपुर च्याम्पियन भएको थियो । जनकपुरलाई च्याम्पियन बनाउँन ललितले १७ विकेट लिएका थिए । १० खेलमा ४० ओभर गरेका ललितले २ सय १३ रन खर्चिदैं १७ विकेट लिएका हुन् ।

उनी एनपिएलमा सर्वाधिक विकेटकर्ताको सुचीमा शीर्ष स्थानमा सुदूरपश्चिम रोयल्सका स्कट कुग्गेलेइनसँगै रहे । दुवैको नाममा लिगमा १७ विकेट रहेको छ ।

उता, जनकपुर बोल्ट्सका अलराउन्डर जेम्स निशम एनपिएलको सर्वोत्कृष्ट खेलाडी घोषित भएका छन् । जनकपुरलाई च्याम्पियन बनाउँन बलिङ र ब्याटिङ दुवैमा योगदान गरेका निशम लिगकै सर्वोत्कृष्ट खेलाडी भएका हुन् ।

जनकपुरबाट ९ खेल खेल्दै निशमले १ अर्धशतकसहित २ सय ४७ रन बनाउँनुको साथै ७ विकेट पनि लिएका छन् ।

दीपेन्द्रले पाए कार

एनपिएलमा नेपाली खेलाडी मध्येका सर्वोत्कृष्ट हुँदै सुदूरपश्चिम रोयल्सका कप्तान दीपेन्द्रसिंह ऐरीले कार पाएका छन् । उत्कृष्ट प्रदर्शनको सहयोगमा टोलीलाई फाइनलसम्म पुर्याउन सफल दीपेन्द्रले प्रतियोगिताको सर्वोत्कृष्ट नेपाली खेलाडी भएका हुन् ।

उनले ओमोडाको ६२ लाख रुपैयाँ मुल्यको‌ कार प्राप्त गरेका हुन् । प्रतियोगितामा दीपेन्द्रले २ सय २७ रन बनाउँदा ९ विकेट हात पारेका थिए ।

कर्णालीका विपिन उदीमान

कर्णाली याक्सका विपिन शर्माले एनपिएलको उदीयमान खेलाडीको अवार्ड जितेका छन् । ट्यालेन्ट हन्टबाट छनोट भएर कर्णालीबाट एनपिएल खेलेका विपिनले ८ खेलमा १३ विकेट लिएका थिए ।

विपिन चितवन राइनोजसँगको खेलमा प्लेयर अफ द म्याच समेत भएका थिए । उदीयमान खेलाडी बनेका विपिनले नगद रु ५० हजार र १० लाख बराबरको छात्रवृत्ती प्राप्त गरेका छन् ।

इङ्ग्ल्याण्डका जेब प्लेयर अफ द टुर्नामेन्ट

सुदूरपश्चिम रोयल्समा आबद्ध भएका इङ्ग्ल्याण्डका अलराउण्डर सेफ अलि जेब लिगको प्लेयर अफ द टुर्नामेन्ट भएका छन् । उनले लिगको ९ खेलमा २ अर्धशतकको सहयोगमा २ सय ७५ रन तथा १२ विकेट समेत लिएका थिए ।

उनले प्लेयर अफ द टुर्नामेन्ट बन्दै नगद रु ५ लाख प्राप्त गरेका छन् ।