काठमाडौँ । आत्मदाहको प्रयासपछि उपचारको क्रममा निधन भएका मुगुका राइडर गणेश नेपालीको परिवार र सरकारबिच ९ बुँदे सहमति भएसँगै संयुक्त राजनीतिक दलित सङ्घर्ष समितिले आन्दोलनका कार्यक्रम स्थगित गरेको छ ।

समितिका संयोजक दलजित श्रीपालीले सोमबार विज्ञप्ति जारी गर्दै असार २९ गते दिउँसो १ बजे माइतीघर मण्डलामा आयोजित विरोध कार्यक्रम र सोही दिन ७७ वटै जिल्ला प्रशासनबाट नेपाल सरकारका प्रधानमन्त्रीलाई अल्टिमेटमसहितको ज्ञापन पत्र दिने चरणबद्ध आन्दोलनका कार्यक्रमहरू हाललाई स्थगित गरिएको जनाएका हुन् ।

समितिले ९ बुँदे सहमति यथाशीघ्र कार्यान्वयन गर्न माग गर्दै दलित समुदायले भोग्दै आएका संरचनात्मक विभेद, समावेशी समानुपातिक व्यवस्था तथा हालसम्म सरकारसँग भएका सहमति, सम्झौता र प्रतिबद्धताहरू व्यवहारमा लागू गर्न जोडदार माग गरेको छ ।