काठमाडौँ । कर्णाली प्रदेशका मुख्यमन्त्री यामलाल कँडेलले कांग्रेसका ४ मन्त्रीले राजीनामा दिएसँगै उनीहरुले सम्हाल्दै आएको मन्त्रालय आफैँसँग राखेका छन् ।

उनले संविधानको धारा १६८ को उपधारा ९ बमोजिम नियुक्ति, हेरफेर र कार्यविभाजनका लागि प्रदेश प्रमुखसमक्ष सिफारिस गरेका हुन् ।

जसअनुसार कँडेलले सामाजिक विकास, आर्थिक मामिला तथा योजना, जलस्रोत तथा ऊर्जा विकास र उद्योग, पर्यटन, वन तथा वातावरण मन्त्रालय आफैँसँग राखेका हुन् ।

आजै आर्थिक मामिला तथा योजना मन्त्रीमा राजीवविक्रम शाह, सामाजिक मन्त्री घनश्याम भण्डारी, जलस्रोत तथा ऊर्जा मन्त्री विजया बुढा र उद्योग, पर्यटन, वन तथा वातावरण मन्त्री सुरेश अधिकारीले राजीनामा दिएका थिए। उनीहरू ०८१ साउनमा मन्त्री बनेका थिए।

कांग्रेसका मन्त्रीहरूले राजीनामा दिएसँगै नयाँ समीकरणको चर्चा सुरु भएको छ।