पोखराको मणिपाल शिक्षण अस्पतालबाट हराएका बिरामी मृत फेला परेका छन्।

सोमबार उपचारका लागि बाबु हरिप्रसाद मिश्रसँगै अस्पताल पुगेका तनहुँ घर भई पोखरा महानगरपालिका-१६ स्थित लामाचौर बस्ने १९ वर्षीय संगम मिश्र सोही साँझ अस्पतालबाटै हराएका थिए।

प्रहरीले उनको खोजी गर्न शुक्रबार मध्याह्न १२ बजेदेखि पोखरा महानगरपालिका-१६ दीपस्थित सेती नदीको ड्याम खोलेको थियो।

त्यसरी खोजी गर्दा शुक्रबार अपराह्न साढे ३ बजे पोखरा महानगरपालिका-३ नदीपुरस्थित सेती नदीको बीचमा ढुंगामा अड्किएको अवस्थामा मृत भेटिएको कास्की प्रहरी प्रवक्ता डिएसपी श्रवणकुमार विकले जानकारी दिए।

ज्वरोको उपचार गर्न बाबु हरिप्रसादसँगै सोमबार मणिपाल अस्पताल आएका संगम सोही साँझ साढे ६ बजे अस्पतालबाट हराएका थिए। बाबु औषधी लिन बाहिर निस्किएका बेला संगम अस्पतालबाट भागेका थिए।

खोजतलासका क्रममा प्रहरीले मणिपाल अस्पतालबाट नदिपुरतर्फ आउने झोलुङ्गे पुलको बीचमा संगमले लगाएको कपडा र उनको आइडी कार्ड फेला पारेको थियो।

सेती नदिको बहाव बढाउन शुक्रबार ड्याम खोलिएको थियो।

मृतकको शव पोष्टमर्टमका लागि पश्चिमाञ्चल क्षेत्रीय अस्पताल लगिएको र घटनाबारे अनुसन्धान अगाडि बढाइएको डिएसपी विकले जानकारी दिएका छन्।