जनकपुरधाममा आदिकवि भानुभक्तको सालिक पुनःनिर्माण शुरू


जनकपुरधाम, जनकपुरधाम उपमहानगरपालिकाका नगर प्रमुख मनोजकुमार साहले भानुचोकमा भानुभक्तको सालिक निर्माणका लागि शिलान्यास गरेका छन् ।

२०६२र०६३ को मधेश आन्दोलनको क्रममा भानुचोकमा रहेको भत्काइएको आदिकवि भानुभक्तको शालिक पुनः निर्माणका लागि शनिबार बिहान शिलान्यास गरेका हुन् ।

शिलान्यासको क्रममा राजनीतिक दलका युवाले विरोध गरे पनि शिलान्यास कार्यक्रम सम्पन्न गर्दै जनकपुरधामका प्रमुख साहले राजनीतिक प्रतिनिधिकै रोहबरमा बैठक बसी बोर्डबाट भानुभक्तको सालिक बनाउने निर्णय भएकाले विरोध नगर्न आग्रह समेत गरे ।

बोर्डको निर्णय अनुरुप उपभोक्ता समिति गठन गरिएको छ । त्यसैले शान्तिपूर्ण वातावरणमा कार्य सम्पन्न गर्नमा सबैलाई साथ सहयोग गर्न आग्रह गर्दै सर्वदलीय बैठकमा विरोध जनाउने राजनीतिक दललाई वार्ताको लागि आह्वान समेत गरे ।

उनले दुई दिनभित्र सर्वदलीय बैठक बसी यो समस्या समाधान गर्ने बताए । जनकपुरधामका प्रमुख साहले पुरानो संरचना शान्तिपूर्ण वातावरण समयमा निर्माण सम्पन्न हुनुपर्ने भन्दै सबैको सहमतिमा कार्य सम्पन्न गर्न सर्वदलीय बैठकको लागि प्रमुख जिल्ला अधिकारीलाई समेत जानकारी गराएको बताए ।

मधेश आन्दोलनको क्रममा भानु चोकमा रहेको भानुभक्तको सालिक तोडफोड गरिएपछि उक्त चोकको नाम सहिद रमेश महतो चोक घोषणा गरिएको थियो ।

मधेश आन्दोलनको क्रममा भानुचोकमा रहेको आदिकवि भानुभक्तको शालिक तोडफोड गरि तत्कालै सो चोकलाई मधेश आन्दोलनका प्रथम सहिद रमेश महतो चोक कानूनी र आधिकारिक घोषणा भएको छैन् ।

यता, नेपाली कांग्रेस धनुषाका जिल्ला उपसभापति गणेश झाका अनुसार भानुचोकमा भानुभक्तकै शालिक निर्माण गरिए जनकपुरधामको मान सम्मान र पौराणिक दृश्यांकन कायम रहन्छ, विगतमा राजनीतिक दलका प्रतिनिधिहरुसँगको सहमतिमा यो चोक पुनः निर्माण गर्न थालिएको हो ।

यसअघि लोसपा निकट लोसपा युवा संघ धनुषाका अध्यक्ष प्रशान्त झाको अगुवाईमा सहिद रमेश महतोको सालिक स्थापना गरिनुपर्ने मागसहित ज्ञापनपत्र बुझाएका थिए ।

 


प्रकाशित मिति : २०८० बैशाख १६, शनिबार गते

धेरै पढिएको

ताजा समाचार