काठमाडौँ । स्वतन्त्र ऊर्जा उत्पादकहरूको संस्था, नेपाल (इप्पान) को नवनिर्वाचित कार्यसमितिले पद तथा गोपनीयताको शपथ ग्रहण गर्दै औपचारिक रूपमा आफ्नो जिम्मेवारी सम्हालेको छ ।

आइतबार राजधानीमा आयोजित एक विशेष कार्यक्रमका बिच २४औँ वार्षिक साधारणसभा तथा आठौँ अधिवेशनबाट निर्वाचित पदाधिकारी एवं सदस्यहरूले कार्यभार ग्रहण गरेका हुन् ।

सोही अवसरमा निवर्तमान कार्यसमितिले नयाँ नेतृत्वलाई जिम्मेवारी हस्तान्तरण गरेको थियो । इप्पानले यस पटक विधान संशोधन गर्दै संस्थाको नेतृत्व चयन प्रक्रियामा दीर्घकालीन महत्त्व राख्ने परिवर्तनहरू समेत गरेको छ ।

इप्पानको नयाँ नेतृत्वमा मोहनकुमार डाँगी अध्यक्ष रहेका छन्। उनी विधान संशोधनअघिको व्यवस्था अनुसार वरिष्ठ उपाध्यक्षबाट स्वतः अध्यक्ष बनेका हुन् । कार्यसमितिको वरिष्ठ उपाध्यक्षमा उत्तम भ्लोन लामा चयन भएका छन् ।