काठमाडौँ। साउन महिनाको अन्तिम चौथो सोमबार काठमाडौँको पशुपतिनाथ मन्दिरमा बिहानैदेखि भक्तजनको घुइँच लागेको छ।

बिहान वर्षा भइरहे तापनि वर्षाकै बीच श्रद्धालुहरू पूजा आराधना तथा दर्शनका लागि पशुपतिनाथ मन्दिर क्षेत्र पुगेका छन्।

साउनको सोमबार दर्शनका लागि आउने भक्तजनलाई सहज बनाउन पशुपतिनाथका चारै ढोका बिहान ३:०० बजेदेखि खुला गरिएको छ।

साउनको अन्तिम सोमबार बोलबम यात्राका लागि भक्तजनहरू वाग्मती नदी किनारस्थित सुन्दरीजलमा जम्मा भएका छन्। प्रत्येक वर्ष साउनको सोमबार सुन्दरीजलमा जम्मा भई स्नान गरेर शुद्ध कपडा लगाई पशुपतिनाथमा जल चढाउने परम्परा रहेको छ।

पशुपति क्षेत्र विकास कोषका सदस्यसचिव तीर्थ श्रेष्ठले बोलबम यात्रीका लागि जल चढाउन उत्तरतर्फको ढोकाको व्यवस्था गरिएको जानकारी दिएका छन्। भक्तजनले बासुकी मन्दिर हुँदै उत्तरढोकाबाट जल चढाउन सक्ने व्यवस्था मिलाइएको छ।