काठमाडौँ । खाद्य प्रविधि तथा गुण नियन्त्रण डिभिजन कार्यालय, जनकपुरले गरेको बजार अनुगमनका क्रममा जनकपुरधामस्थित मिथिला थाली प्रा.लि. कारबाहीमा परेको छ ।

खाद्य स्वच्छता र गुणस्तरमा लापरबाही गरेको पाइएपछि उक्त होटललाई २५ हजार रुपैयाँ जरिवाना गरिएको विभागले शुक्रबार जारी गरेको विज्ञप्तिमा उल्लेख छ ।

मधेस प्रदेशका गृह, सञ्चार तथा कानुन मन्त्री फकिरा महतोसहितको संयुक्त अनुगमन टोलीले गरेको निरीक्षणका क्रममा मिथिला थालीमा गम्भीर त्रुटीहरू फेला परेका थिए ।

विभागका अनुसार उक्त होटलले खानेकुरामा अखाद्य कृत्रिम रङ्गको प्रयोग गरेको भेटिएको थियो । अनुगमन टोलीले अखाद्य रङ्ग प्रयोग गरी तयार पारिएको करिब ५ केजी ब्याटर (पिठोको घोल) समेत नष्ट गरेको छ ।

निरीक्षणका क्रममा होटलको भान्छा कोठाको सरसफाइ अत्यन्तै न्यून रहेको, भान्छा र भाँडा माझ्ने स्थान एउटै ठाउँमा रहेको र यसअघि दिइएका निर्देशनहरू समेत पालना नगरेको पाइएको विभागले जनाएको छ ।

उपभोक्ता संरक्षण ऐन, २०७५ बमोजिम सहायक प्रमुख जिल्ला अधिकारीमार्फत होटललाई तत्काल २५ हजार रुपैयाँ जरिवाना गरिएको हो ।

सोही अनुगमनका क्रममा रामानन्द चोकमा रहेको सृष्टि वैष्णव होटललाई पनि दर्ता बिना व्यवसाय सञ्चालन गरेको र पटक-पटक प्रयोग गरिएको कमसल तेलमा जेरी तथा समोसा पकाएको भेटिएपछि २५ हजार रुपैयाँ जरिवाना गरिएको छ ।

विभागले जनकपुरका अन्य ६ वटा मिठाई तथा नास्ता पसलहरूको पनि अनुगमन गरेको थियो । रघुपति मिष्ठान्न भण्डार, स्वादिष्ट नास्ता पसल, शुभलक्ष्मी नास्ता पसल, मोहन माहाराजाजी नास्ता पसल, गुड्डु होटल र होटल सीराशरणमा गरिएको अनुगमनमा पनि सरसफाइको कमी, लेवल नभएका सामानको प्रयोग र मसीजन्य कागजमा राखेर खानेकुरा बिक्री गरेको पाइएको छ ।

वरिष्ठ खाद्य अनुसन्धान अधिकृत डा. बाल कुमारी शर्माका अनुसार कुल ८ वटा व्यवसायको अनुगमन गर्दा जम्मा ५० हजार रुपैयाँ जरिवाना असुल गरिएको छ भने कैफियत देखिएका पसलहरूलाई सुधारका लागि कडा निर्देशन दिइएको छ।